ENGLISH

Koraal Tabak Kòrsou | Temporada di brui: aprel – ougùstùs

Ta kua e para aki?
E Sternchi (Sternula antillarum antillarum) ta nos propio para di laman Karibense, i un di e poko espesienan ku ta protehá pa lei aki na Kòrsou. E para chikitu aki ta dùik manera un torpedo, bula sentenares di kilometer, i ta forma su famia aki riba nos kosta nort. Esaki ta tuma lugá anualmente.

Temporada di brui: di aprel pa ougùstùs, stap pa stap

	Aprel: Tempu di frei Durante e dianan aki, e paranan maskulino ta broma ku regalonan di piská i ta duna shownan aereo sofestiká pa purba gana e para femenino. Unabes nan haña un pareha, nan ta frei i keda huntu henter e temporada.
	Fin di aprel: Ponementu di webu Na e punto aki, e nèshi ta un kapa simpel di santu òf piedra chikitu di laman 'limestone'. Tin 1-2 webu ku diferente mancha poné, perfektamente kamuflá den tera. Kasi invisibel, pues fasilmente bo no ta mira nan.
	Mei pa yüni: Nasementu Un beibi ta sali for di su webu despues di 19 pa 25 dia. Kada mayor ta tuma turno pa inkubá i trese piská chikitu pa e beibinan kome. Despues di 2 dia, e beibinan ta bai laga e nèshi i buska refugio kontra solo tras di piedranan.
	Yüli pa ougùstùs: Promé buelo Despues di mas o ménos 3 siman, e beibi ta hasi su promé buelo. Ora ku e beibinan bira fuerte sufisiente, nan tur ta move bai nan áreanan di wenter na parti nort di Sùit Amerika òf na e kosta sùit di Merka. Siguiente aña e kolonia ta bini bèk pa un temporada nobo di brui.

Dikon nan mester di nos yudansa?

Sinku aña di observashon na Koraal Tabak a mustra ku e kolonia aki ta enfrentá menasanan serio. Esaki ta bini prinsipalmente for di nos bestianan i nos mes komo habitantenan.

• Pushinan di kaya (e menasa mas grandi): Imágennan di kámara ta mustra kon pushinan ta kome e webunan i e paranan adulto na diferente nèshi. E alanan ku ta keda atras ta un prueba mortal.
• Kachónan ku ta kana liber: Asta si nan no ataká, nan presensia anochi ta strès e parehanan ku ta brui.
• Trapamentu: E webunan ta parse piedra di laman. Hendenan ku ta kana, kore baiskel i ‘quad’ den e área ta trapa i kibra nan sin sa.
• Strobashon = webunan morto: Ora hende keda muchu den besindario di e nèshi, e mayornan no por sinta riba e webunan pa protehá nan kontra solo. Webunan ku bira muchu kayente no ta finalisá nan siklo.

Reglanan simpel ku impakto grandi

• Ningun bishitante NO ta pèrmití pa bai den e área koló kòrá (wak mapa) durante aprel pa ougùstùs. No tin eksepshon.
• Kachónan mester ta mará na banchi i bou di supervishon na tur momentu ku bishitá área konservá di Koraal Tabak.
• Bo a topa un sternchi i su nèshi parti pafó di e área di brui? Sigui kana i mantené bo distansia. No stòp i keda wak.
• No ta pèrmití ‘quad’, basikel òf vehíkulo banda di e área di brui durante di e temporada di brui.
• Stroba òf hasi daño na e paranan aki ta nifiká inkumplimentu ku lei. Ta prohibí. Aki na Kòrsou, e sternchi ta legalmente protegá pa lei.
• Bo ta gusta opservá? Mantené bo distansia i hasi uso di ‘verrekijker’. Laga nos protegá e paranan aki pa nan forma nan famia na pas.

Un santuario konstruí speshal pa nan

Un santuario protegá ku waya eléktriko na e parti nort wèst di Koraal Tabak ta protegá e kolonia for di pushi, kachó i djaka. El a keda establesé despues di 5 aña di opservashon, kual a mustra ku e kolonia ta bou di menasa serio.